01 Mar Interior Galego Vivo estará nas municipais en coalición con outras agrupacións
Interior Galego Vivo estará nas municipais en coalición con outras agrupacións
Teremos presenza en concellos de todo o País mediante unha fórmula que garante a autonomía local
O pasado sábado, 25 de febreiro, integrantes da Coordinadora de Interior Galego Vivo da provincia de Lugo reunímonos en Antas de Ulla, con conexión a través da Rede con representantes da provincia de Ourense, que non se puideron achegar fisicamente pola neve, para avanzar na presentación das candidaturas electorais nas provincias interiores.
Ao tempo, están activados grupos de traballo para seguir sumando agrupacións locais do resto da xeografía galega, no marco da defensa de políticas activas de emprego e dignificación de servizos públicos que permitan a vida digna nas comarcas interiores de toda Galicia, incluídos concellos próximos á costa pero abandonados das dinámicas económicas.
Neste momento, está xa avanzada a fórmula de concorrencia electoral, que será unha coalición e que, ao longo deste mes de marzo está aberta a todos aqueles proxectos municipalistas que concorden cos nosos obxectivos e desexen participar.
A preservación de siglas e autonomía local, dentro do marco común, permite tecer unha rede descentralizada para apoiarnos mutuamente para as xestións electorais e sumar forzas de cara a contabilizar conxuntamente votos para a adscrición de deputados/as provinciais.
En abril está previsto un acto de presentación das candidaturas e do programa común, alén das actuacións que cada grupo local vaia desenvolver de aquí ás municipais do 28 de maio.
É preciso sumar forzas para loitar contra o abandono de amplas comarcas interiores de toda Galicia, esixindo xustiza social e territorial, acceso equitativo aos servizos públicos e sumar unha voz forte no panorama político galego en defensa das persoas que queremos seguir a vivir no medio rural.
Para contactar con IGV: interiorgalegovivo@gmail.com
No Comments