Interior Galego Vivo rexeita unha RPT que compromete as finanzas deVilardevós e propón un consenso real

29 Set Interior Galego Vivo rexeita unha RPT que compromete as finanzas deVilardevós e propón un consenso real

O grupo municipal denuncia irregularidades no proceso, o beneficio directo á
alcaldesa e o risco de desaxuste económico nun concello rural

Vilardevós, 29 de setembro de 2025.

Interior Galego Vivo (IGV) votou hoxe en contra da Relación de Postos de
Traballo (RPT) presentada pola alcaldía no Pleno de Vilardevós. A decisión
baséase en tres motivos principais:

1. Impacto económico insostíbel, cun sobrecusto que compromete o
   orzamento municipal.
2. Beneficio directo á alcaldesa, que vería incrementado o salario do posto
   de educadora familiar en 6.734 € anuais.
3. Proceso irregular e sen consenso, con falta de transparencia e diálogo
   real cos grupos.
   Irregularidades no proceso
   Na súa intervención, a voceira de IGV, Tamara Balboa, acolleuse ao artigo 92
   do ROF para solicitar a retirada do asunto da orde do día, lembrando que «unha
   decisión desta importancia require consenso real e transparencia».
   IGV denuncia que:

• A negociación foi delegada nunha concelleira do PSOE en lugar de ser
  dirixida pola alcaldía.
• Só se celebrou unha reunión formal con IGV e PP, malia prometerse máis
  encontros.
• As alegacións da oposición foron levadas ao Pleno de xuño sen que a
  RPT estivese rematada.
  Incremento salarial da alcaldesa
  Un dos aspectos máis graves é que a alcaldesa, titular da praza de educadora
  familiar, é unha das principais beneficiadas, cun incremento de 6.734 € anuais.
  «Chegamos a este voto en contra contra a nosa vontade, tras pedir
  reiteradamente que o procedemento se pospuxera ata o relevo na alcaldía»,
  afirmou Balboa.
  Un modelo alleo á realidade rural
  IGV subliña que non se pode aplicar unha RPT propia dunha cidade nun concello
  como Vilardevós. De feito, en concellos que multiplican por cinco a poboación de
  Vilardevós, a remuneración do posto equivalente é inferior ao salario que xa
  percibe hoxe a alcaldesa, sen contar co incremento que agora se propón.
• Orzamento limitado: o gasto en soldos pode restar fondos para servizos
  básicos.
• Renda baixa: Vilardevós ten unha das rendas per cápita máis baixas de
  Galiza e pensións medias de 906,68 € mensuais, que percibe preto do 50
  % da poboación.
• Desaxuste social: os incrementos salariais municipais contrastan coa
  realidade económica local.
  Alternativa de IGV
  Interior Galego Vivo propón:

1. Paralizar a RPT actual ata o cambio na alcaldía.
2. Encargar un estudo económico independente sobre o impacto real.
3. Abrir unha mesa de diálogo cos grupos políticos e representantes do
   persoal.
4. Adaptar os postos e salarios á realidade dun concello rural, garantindo
   estabilidade laboral e equilibrio orzamentario.
   Declaración final
   «A política municipal debe ter os pés na terra: salarios dignos si, pero sempre
   compatíbeis cos servizos sociais e infraestruturas que necesita a nosa
   veciñanza. Facemos e faremos política para a xente, custe o que custar»,
   concluíu Tamara Balboa.