
07 Mar 8M: construír Igualdade dende cada parroquia
As mulleres de Por un Interior Galego Vivo temos claro que en 2022 cómpre un renovado impulso á loita feminista do #8M; a pandemia non fixo máis que agravar as desigualdades.
En cada lugar, en cada parroquia, en cada vila do noso país deben escoitarse as nosas arelas de #igualdade.
No interior galego as #mulleres contamos con cada vez menos servizos, as nais temos case imposíbel conciliar, aínda non se avanzou na corresponsabilidade, todo tipo de traballadoras sofremos a #precariedade, as persoas coidadoras temos cada vez máis cargas e padecemos ausencia de atención aos nosos malestares, as #mozas continuamos tendo que emigrar e a oferta educativa é cada vez máis cativa para as nenas e as crianzas.
As boas palabras das administración sucédense e o “feminismo institucional” ritualiza as loitas, mais dende IG-VIVO temos claro que sen investimentos reais e oportunidades de futuro na nosa #Terra só continuaremos afondando no foxo da desigualdade e da discrimación.
Neste 2022 as galegas enfrontamos aínda unha diferencia salarial a respecto dos homes dun 19%, fenda que se agrava segundo avanza a idade, e 46,7% das traballadoras cobramos menos do SMI.
Na temporalidade ocupamos 76,7% dos traballos parciais e a precariedade é a norma, pois moitos dos contratos asinados duran menos dun mes e as nosas pensións teñen, de media ,10 anos menos de cotización cós homes, e 36% das desempregadas non percebemos nengún tipo de subsidio por desemprego.
O 87% das mulleres galegas traballamos no sector dos servizos, que é un dos de maior precariedade e de maior perda de direitos laborais o que convirte a #conciliación nun papel mollado na nosa realidade diaria. Ademais, quen asume maioritariamente excedencias, reducións laborais e permisos para coidado de crianzas somos as mulleres.
Por iso, 20,05% das mulleres estabamos en risco de pobreza ou exclusión social en 2020.
Fomos as caixeiras, as coidadoras, as sanitarias, as docentes, as labregas que gardamos a sociedade durante a pandemía. Somos as que nos involucramos no tecido parroquial, veciñal, nas AMPAS… somos as tecedeiras da #comunidade e ferreiras dun mundo mellor.
Queremos:
* Corresponsabilidade e igualdade no reparto entre homes e mulleres das tarefas do fogar e de coidados.
* Aumento exponencial do orzamento para políticas de Benestar, con especial importancia do Servizo de Axuda no Fogar, que debe ser público.
* Erradicación da precariedade laboral en eidos feminizados como a Sanidade, Dependencia ou Servizos.
* Xeración de novos eidos de emprego no interior galego con boas condicións laborais e igualdade entre homes e mulleres.”
Por isto e moito máis, este #8M acompañamos o movemento #feminista galego.
Nos municipios do interior haberá mobilizacións en:
– Monforte. 20.30 h (praza de España)
– Chantada. 20 h (da praza de Santa Ana ao Cantón)
– Lalín 20 h
– Vilalba. 20 h
– Ourense. 20h
– Lugo. 20 h
#construírfuturo #interiorgalegovivo #igualdade
No Comments